Өткен аптада Жібек Нагпурдағы осындай жарыста жекелей және жұптық сында үздік шыққан еді.
Қазақстандық теннисші, әлемнің 422-ракеткасы Жібек Құламбаева жұптық сында Аурангабад (Үндістан) ITF W15 турнирінің чемпионы атанды, деп хабарлайды Sn.kz ақпарат порталы.
Турнирдің 1-ракеткалары Жібек Құламбаева мен ресейлік Екатерина Яшина финалда германиялық Анастасия Купарев — өзбекстандық Севиль Юлдашевамен бас жүлдені сарапқа салды.
Қазақстандық-ресейлік жұп 6:1, 6:4 есебімен жеңіске жетіп, чемпиондық атаққа ие болды. Ж.Құламбаева жекелей сында жартылай финалда босниялық Теа Ковачевичпен кортта кездесті. Аса тартысты өткен матчта Т.Ковачевич 7:5, 6:7 (3:7), 7:6 (7:4) есебімен басымдық танытып, финалға жолдама алды.
Өткен аптада Жібек Нагпурдағы осындай жарыста жекелей және жұптық сында үздік шыққан еді.
Қазақстанның екінші, әлемнің 72-ракеткасы Юлия Путинцева жұптық сында италиялық Элизабетта Кочареттомен бірге Чарльстон (АҚШ) WTA 500 жарысының жартылай финалында америкалықтар Дезире Кравчик – Кэти Макналлимен ойнауы керек еді. Алайда Путинцева – Кочаретто матчқа қатысудан бас тартты.
Тағы бір қазақстандық, рейтингіде 353-орындағы Бейбіт Жұқаев Сан-Луис Потоси (Мексика) челленджер турнирінің жартылай финалына өте алмады. Ол ширек финалда әлемнің 95-інші, осы доданың 1-ракеткасы, аустралиялық Джеймс Даквортқа жол берді – 2:6, 3:6.