Алайда оның нақты қашан ойынға шығатыны әзірге белгісіз.
«Елімай» және Қазақстан құрамасының жартылай қорғаушысы Рамазан Оразов иығынан алған жарақатынан кейін командалық жаттығуға қайта қосылды, деп хабарлайды Sn.kz ақпарат порталы.
Футболшы Семейдегі жаттығудан суреттер жариялап, командадағы әріптестерімен бірге жаттығып жатқанын көрсетті.
«Командадағы әріптестеріммен қайта бірге жаттығудың өзі керемет сезім! Жақында көрісеміз», – деп жазды Оразов.
Оның өкілі Кен Ван Дейк футболшының оңалтуы сәтті өтіп жатқанын және алаңға тезірек оралу үшін барын салып жүргенін айтты. Алайда оның нақты қашан ойынға шығатыны әзірге белгісіз.
Еске сала кетейік, Оразов шілдеде Конференциялар лигасының іріктеу кезеңіндегі «Алашкертке» қарсы кездесуде иығынан жарақат алып, Мәскеуде ота жасатқан еді.
Бұған дейін футболшының толық қалпына келуіне алты айға дейін уақыт қажет болуы мүмкін екені айтылған. Дегенмен оның командалық жаттығуға ерте қосылуы оңалту жұмыстарының жоспардан жылдамырақ жүріп жатқанын көрсетеді.
Егер қалпына келуі осылай жалғасса, Оразов қыркүйекте Қазақстан құрамасының Ұлттар лигасындағы ойындарына қатысуы мүмкін.