Дастан Сәтпаев «Бернлидің» үздік үш ойыншысының қатарына енді

Қазақстандық шабуылшы Дастан Сәтпаев «Бернли» сапында алғаш рет негізгі құрамда алаңға шығып, командадағы үздік ойыншылардың бірі атанды. 18 жастағы футболшы Англия лигасы кубогының 1/32 финалында «Брэдфорд Ситиге» қарсы кездесуде 80 минут ойнады, деп хабарлайды Sn.kz ақпарат порталы.

Матч Брэдфордтағы «Вэлли Пэрейд» стадионында өтіп, негізгі уақытта командалар есеп аша алмады — 0:0. Регламентке сәйкес жеңімпаз бірден пенальти сериясында анықталды. Онда «Брэдфорд Сити» 4:2 есебімен басым түсіп, «Бернлиді» жарыстан шығарды.

Сәтпаев үшін бұл кездесу ерекше болды. Ол «Бернли» сапында алғаш рет ресми матчты негізгі құрамда бастады және алаңда 80 минут өткізді. Қазақстандық шабуылшы ауыстырылғандықтан, пенальти сериясына қатысқан жоқ.

Кездесуден кейін Сәтпаевтың ойыны жоғары бағаланды. Қазақстандық футболшы 7,1 ұпай алып, «Бернлидің» матчтағы үздік үш ойыншысының қатарына енді.

Сәтпаев 80 минут ішінде қарсылас қақпасына екі рет соққы бағыттап, бір нәтижелі шабуылға бастайтын пас берді. Сондай-ақ ол 35 пастың 30-ын дәл жеткізіп, 86 пайыздық дәлдік көрсетті.

Қазақстандықтың доппен әрекеті де белсенді болды: ол допқа 56 рет тиіп, екі дриблинг әрекетінің біреуін сәтті орындады. Бұдан бөлек, 18 рет алға жылжып, допты ілгері алып шығуға атсалысты.

Қорғаныста да Сәтпаев нәтижелі қимылдады. Ол төрт рет доп тартып алуға әрекет жасап, төртеуінде де жеңіске жетті. Позициялық жекпе-жектердің алтауына қатысып, бесеуінде қарсыласынан басым түсті. Матч барысында 13 рет доптан айырылды.

Осылайша, «Бернли» Англия лигасы кубогынан шығып қалғанымен, Сәтпаевтың клуб сапындағы алғашқы негізгі құрамдағы ойыны жеке көрсеткіштері жағынан сәтті өтті.

Ал Англия футболының үшінші дивизионында өнер көрсететін «Брэдфорд Сити» турнирдің 1/16 финалына жолдама алды.