Соболенко Рыбакинаның шешіміне алғашында таңғалғанын жасырмады.
Әлемнің бұрынғы бірінші ракеткасы, беларусьтік теннисші Арина Соболенко қазақстандық Елена Рыбакинаның WTA қорытынды турниріне қатысудан бас тартуына қатысты пікір білдірді, деп хабарлайды Sn.kz ақпарат порталы.
WTA мәліметінше, Елена Рыбакина АҚШ-тың Индиан-Уэллс қаласында жүрген кезінде денсаулығына байланысты маусымның қорытынды турниріне қатыспау туралы шешім қабылдаған. Айта кетейік, қазақстандық спортшы биыл аталған жарыста былтыр жеңіп алған чемпиондық атағын қорғауы керек еді.
Соболенко Рыбакинаның шешіміне алғашында таңғалғанын жасырмады. Алайда қазақстандық теннисшінің биылғы маусымы оңай болмағанын ескеріп, оның таңдауын түсінетінін жеткізді.
«Әрине, таңғалдым. Бірақ оның биыл физикалық және моральдық тұрғыдан көп қиындық көргенін түсінемін. Көптеген ауыр матч өткізіп, ұзақ турнирлерге қатысты. Оның үстіне Азияда да жиі ойнады. Сондықтан ойлана келе, бұл шешіміне таңғалмаймын», – деді ол First and red басылымына берген сұхбатында.
Сондай-ақ беларусьтік спортшы Рыбакинаның биылғы маусымын жоғары бағалап, оның әлемдік рейтингте бірінші орынға көтерілуіне кепілдік алғанын атап өтті. Соболенконың пікірінше, қазақстандық теннисші үшін қазір ең маңыздысы – денсаулығын қалпына келтіріп, жақсылап демалу және келесі маусымға тың күшпен оралу.
Еске салайық, Рыбакинаның турнирден бас тартатыны туралы ақпарат тарар алдында әлеуметтік желіде оның жарияланбаған сұхбатынан үзінді жарияланған еді. Видеода теннисші өзін жайсыз сезінетінін айтып, сұхбатты жалғастырудан бас тартқан.