Данияр Елеусінов қайта кәсіпқой боксқа ауысты

Қазақстандық боксшы, 2016 жылғы Рио Олимпиадасының чемпионы Данияр Елеусінов Boxing Star LLC менеджерлік компаниясымен эксклюзивті келісімшартқа қол қойып, кәсіпқой бокс әлеміне қадам басты деп жазады «ҚазАқпарат».

Данияр бокс әлемінде соңғы 4 жылда өзін жартылай орта салмақта көшбасшы боксшы екенін танытып келеді. Әуесқойлар арасында 2013 жылы әлем чемпионы, 2016 жылы Олимпиада чемпионы атанған қазақстандық боксшының өнерін алыс құрлықтағы бокс сарапшылары жоғары бағалап жатыр. Қазірдің өзінде мамандар Елеусіновтың жұдырықтасу мәнерін әйгілі Флойд Мейуезер мен Василий Ломаченкоға теңеуде.

Елеусіновтың өмірінде елеулі жаңалық бар. Боксшы Boxing Star LLC менеджерлік компаниясымен келісіп, кәсіпқой боксқа қадам басқалы отыр. Осыған орай боксшы бүгін Астанада БАҚ өкілдерінің басын қосып, баспасөз мәслихатын өткізді. Шараға Америкадан боксшының промоутері британдық Эдди Хирн да келген.

«Даниярдың бізбен бірге жұмыс істейтініне қуаныштымыз. Біз Даниярмен келісімге қол қойдық. Біз Даниярмен бірге Энтони Джошуа секілді Олимпиада чемпионымен жұмыс істейміз. Қазақстандық боксшы Нью-Йорк пен Лондонда жаттығу өткізеді. Әлемнің барлық түкпірінде, соның шінде Қазақстанда да Даниярдың жекпе-жегін өткізуге тырысамыз. Даниярдың әлем чемпионы болуына 100 пайыз күш саламыз», - деді Эдди Хирн.

Эдди Хирн - супер ауыр салмақта WBA Super, IBF және IBO нұсқасы бойынша әлем чемпионы Энтони Джошуаның (20-0, 20 КО), жеңіл салмақтағы WBA Super және IBF чемпионы Райан Барнет (18-0, 9 КО), жартылай орта салмақтағы IBF нұсқасы бойынша бұрынғы әлем чемпионы Кел Брук (37-2, 26 КО) пен орта салмақтағы WBA нұсқасы бойынша бұрынғы чемпионы Дэниэл Джейкобстың (33-2, 29 КО) промоутері.