Көпкүндік «Тур де Франс» веложарысында «Астаналық» Винченсо Нибалидің басты қарсыластарының бірі Альберто Контадор жарыс жолынан шығып қалды, деп хабарлайды Skifnews.kz.
Көпкүндік жарыстың оныншы кезеңінде қолайсыз жағдайда құлаған Контадор жарысты әрі қарай жалғастыра алмайтын болды. Таулы аймақтарды басып өтетін оныншы тур велоспортшыларға онсыз да ауыр тиетін еді. Оның үстіне, нөсер жауынның астында қалған спортшыларға веложарыстың кезекті кезеңін бағындыру тіпті қиынға соқты. Қолайсыз ауа-райы қазақстандық «Астана» велокомандасының бұрынғы капитанына үлкен салдар әкелді. Мәреге дейін 95 шақырым жерде оңбай құлаған Контадор оң тізесі мен сол жамбасынан ауыр жарақат алды. Жедел дәрігерлік көмек көрсетіліп, жарыс жолына қайтадан шыққанымен денсаулығы жарамаған спортшы биылғы Тур де Франс додасын ерте аяқтауға мәжбүр болды.
Анықтама үшін: Альберто Контадор 2007, 2009 және 2010 жылдардағы «Астана» командасының құрамында Тур де Франс веложарысының үш дүркін жеңімпазы. 2008 және 2011 жылдары Джиро д'Италия велододасының екі дүркін жеңімпазы, 2008 жылғы Испания Вуэльтасының жеңімпазы 2007 жылы, 23 қазанда Контадор 2008 жылы Астана командасына кететінін жариялайды. 2011 жылы Астана командасынан Team Saxo Bank командасына ауысты.