Астанада "Абу-Даби Плаза" құрылысындағы шетелдік жұмысшылар мен күзет компаниясы қызметкерлерінің арасындағы қақтығыс кезінде ер адам әлеуметтік желілерде заңға қайшы әрекетке шақырған деп жазады Tengrinews.kz. Осы әрекеті үшін ол қылмыстық жауапкершілікке тартылды.
"Ол ҚР Қылмыстық кодексінің 174-бабының 1-бөлігі бойынша ("Әлеуметтiк, ұлттық, рулық, нәсiлдiк, тектік-топтық немесе дiни алауыздықты қоздыру") айыпты деп танылды. Астана тұрғыны әлеуметтік желілер арқылы қалалықтарды "Абу-Даби Плаза" құрылысындағы шетелдік жұмысшыларға қарсы заңға қайшы әрекет жасауға шақырған", - деп хабарлады Есіл аудандық №2 сотының төрағасы Қанат Тобағалиұлы.
"Ол Facebook арқылы шетелдіктерді жазалау үшін көмекке шақырған. Сот тыңдауы кезінде ешқандай арам ойы болмағанын, көрген соң жаза салғанын айтты", - деді судья.
Астана тұрғыны сотталып, кейін шешімнің үстінен шағым түсірді. "Ол айыпты деп танылды, екі жылға бас бостандығынан айырылды. Алайда апелляциялық инстанция істі қарау барысында жаза мерзімін бір жылға ауыстырды", - деді судья Қанат Тобағалиұлы.