«Есірткі мен телефонды түрме қызметкерлері өздері әкеп береді»: сотталушылар түрмедегі бизнес туралы айтты

Бас бостандығынан айрылған екі жазасын өтеуші темір тордың арғы жағындағы тіршілікті бүкпесіз айтып берген. Алайда, тергеу изоляторы басшыларының сөзінше, бұл ойдан құрастырылған әрі әдейі қасақана жасалған жала болып тұр. Қазір, осы іске қатысты тергеу амалдары басталып кетіпті.

«Біз шындықты айтып жатырмыз, сотталғандар телефонда, картаны, героинды, анашаны қайдан алады дейсіздер. Міне,өздері ақшаға алып келіп, береді».

Шындықты айтып, шырылдадық деген жандар қазір Шымкенттегі тергеу изоляторында жатыр. Олар бұған дейін жасаған қылмысы үшін он жылдан аса түрмеге қамалыпты. Айтуларынша, мұндағы тергеу изоляторында былық жетіп артылады екен. Тек, ақшасын төлесең болғаны.

«100 мың теңге бердім. Алдында дәл осындай телефон кіргізіп берген маған. Ол кейіннен істемей қалды да, мен оны суға ағызып жібердім. Руслан, Сапар бәрі біледі біздің телефонмен сөйлесетінімізді. Міне қуаттағышы, артында тағы сим карталары бар» – дейді жазасын өтеуші.

Мұнан бөлек, сотталушылар түрме басшылығының үстінен де шағымданып отыр. Олардың сөзінше, шенділер сотталушыларды карта ойындарына еріксіз жұмылдыратын көрінеді.

«3-тен бірі маған, 3-тен бірі вор законаларға жіберіп отырасың деген соң мен "иә" деп алдап алдым. Міне, мына сим картамен звондады деді. Мен ешкімге звондамай, сіздерге көрсетіп отырмын» – дейді жазасын өтеуші.

Бірақ, мұны аталмыш мекеменің басшылығы мүлдем теріске шығарды. Барлығы жала дейді. Рас, түрме қызметкерлері кінәсін мойындап отыр. Себебі, салғырттықтың кесірінен оларға ұялы байланыс телефоны жеткізіліпті. Оны туысының бірі кәдімгі қыстық аяқ киімнің өкшесіне жасырып кіргізген екен. Осыны ұтымды пайдаланған әлгі жазасын өтеушілер түрме қызметкерлерінің әрекетін өз пайдасына шешіп отырмақшы болыпты.

«Тыйым салынған заттардың барлығы тәркіленіп алынып, оларға қатысты тәртіптік жаза қолданып және тыйым салынған заттың мекеме аумағына еніп кетуі бойынша департамент тарапынан тексеру жүргізіліп, жауапты адамдардың барлығына тәртіптік шара қолданылды», – дейді тергеу изоляторы басшысының орынбасары Ермек Жалғасбаев.

Осы күні түрмеде тыйым салынған құрылғыны пайдаланып, қызметкерлерге жала жапқан сотталушыларға қатысты тергеу амалдары жүргізіліп жатыр екен. Жазасын өтеушінің бірі өз әрекеттерінің қолдан әдейі жасалғанын мойындап та үлгеріпті. Енді барлық іс материалдары сотқа жолданбақшы. Ал, қызметіне салғырттық танытқан бірқатар тергеу изоляторының қызметкерлері жауапқа тартылыпты.