Шетелдік өнімдерді қолданған тұрғындар жазаға тартылады

Солтүстік Корея кез келген шетелдік ықпалы бар нәрселермен, шетелдік фильмдермен, шетелдік киімдермен ұсталғандарды немесе тіпті шетелдік жаргондарды қолданған адамдарды қатаң түрде жазалауға бағытталған жаңа заң шығарды. Бұл туралы BBC хабарлады.

Юн Ми-со есімді кәріс азаматы оңтүстік кореялық драмамен ұсталғаны үшін өлім жазасына кесілген адамды алғаш көргенде 11 жаста болғанын айтады.

– Оны (жазаны) бүкіл аудан бойынша көруге бұйрық берілді. Егер сіз бұйрықты орындамасаңыз, бұл сатқындыққа жатқызылатын еді, – дейді ол.

Солтүстік Кореяда шетелдік фильмдерді "контрабандалық жолмен" әкелгендерге өлім жазасы кесіледі.

– Көзі байланған адам туралы есімде: Оның көз жасы ағып жатқаны әлі күнге дейін көз алдымда. Бұл менің жүрегіме қатты ауыр тиді. Көзін байлаған зат оның көз жасына шыланған. Олар оны қазыққа байлады, содан кейін атып тастады, – дейді ол.

Солтүстік Кореяда қазір интернет жоқ, әлеуметтік медиа жоқ, тек мемлекет басқаратын бірнеше телеарналар бар. Ол телеарналар ел басшылары не айтқысы келсе, соны жеткізуге арналған.

Оңтүстік Кореяның, АҚШ-тың немесе Жапонияның көптеген бұқаралық ақпарат құралдарын қарап, ұсталған кез келген адам өлім жазасына кесіледі.

Жақында Ким Чен Ын мемлекеттік БАҚ-та елдегі жастар арасындағы "жағымсыз, индивидуалды, антисоциалистік мінез-құлыққа" қарсы күресуге шақырған хат жазды. Ол шетелдік сөйлеу тілдерін, шаш үлгілері мен киімдерін "қауіпті және улы" деп сипаттап, оларды тоқтатқысы келеді.

qamshy.kz