Балуан Ризабек Айтмұхан үйлену тойын дүркіретіп өткізді (ВИДЕО)

Еркін күрес шебері Ризабек Айтмұхан шаңырақ көтерді. Балуанның тойы Астана қаласында өтті, деп хабарлайды Skifnews.kz ақпарат порталы KAZ.NUR.KZ-ке сілтеме жасап. 

Тойға қонақ болып барған белгілі блогер Иван Червинский Instagram желісіндегі парақшасында салтанатты кештен видео жариялады.

"Бүгін әлемнің үздік бапкерлерінің бірі және ата-анасы, әлем чемпионын тәрбиелеп өсірген Қанат Жолдасбаев үлкен той жасады. Ол ұлын – танымал спортшы ғана емес, кең пейілді нағыз интеллигент Ризабек Айтмұханды үйлендірді.

Астанадағы салтанатты мерекеде Қазақстан мен әлемнің спорт жұлдыздарының ортасында мен де болдым, той өте әсерлі өтті.

Әрине, тойдың басты себебі Солтүстік Қазақстан облысы Қызылту ауылының тумасы, Қазақстанның еркін күрес шебері, талантты балуан Ризабек Қанатұлы. Ол Қазақстан тарихында еркін күрестен әлем чемпионы атанған тұңғыш спортшы.

Сондықтан мен біздің Ризабектің өміріндегі тағы бір тарихи сәтке куә болғаныма қуаныштымын. Енді оның жауапкершілігі одан сайын артады. Ризабек пен оның қалыңдығына бақыт, денсаулық, бақ-береке тілеймін", - деп жазды блогер Иван Червинский желіге жариялаған бейнежазба сипаттамасында.

Айта кетейік, палуанның таңдауы Фируза есімді спортшы қызға түскен, қалыңдық спорттық гимнастикадан спорт шебері.

Еске салсақ, Ризабек Айтмұхан 2023 жылы Белградта өткен әлем чемпионатында 92 кг дейінгі салмақта чемпион атанған. Осылайша ол ел тарихында еркін күрестен әлем чемпионы атанған тұңғыш қазақ спортшысы болды.