Билік 19.09.2017 сағат 06:06  632

Еліміздегі орталық мемлекеттік органдар 100 млрд теңгеден астам қаржыны игере алмай отыр

Қаржы министрі Бақыт Сұлтанов орталық мемлекеттік органдардың неліктен бюджет қаражатын игере алмай отырғандығын түсіндіріп берді.

"Бюджет қаржысын игеруде былтырғы жылмен салыстырғанда оң өзгерістер бар. Дегенмен, 1 қыркүйектегі жағдай бойынша 114,8 млрд теңгенің игерілмегені анықталды. Оның 13,2 миллиарды бюджет қаражатын үнемдеуден кейін пайда болса, 101,6 миллиард теңгесі мүлдем игерілмеген", – деді Бақыт Сұлтанов бүгінгі Үкімет отырысында.

Бюджет қаржысын игере алмай отырған министрліктер тізімі мынадай:

Денсаулық сақтау – 20,3 млрд теңге;
Мәдениет және спорт – 9,3 млрд;
Ішкі істер – 9,3 млрд;
Қорғаныс – 7,9 млрд;
Ауыл шаруашылығы – 6,5 млрд;
Білім және ғылым – 6,4 млрд;
Ұлттық қауіпсіздік комитеті – 10,6 млрд.

Министрдің айтуынша, ақшаның дер кезінде игерілмеуіне бюджеттік бағдарламалар әкімгерлерінің жайбасарлығы себеп көрінеді.

"Ағымдағы жылдың 8 айлық қорытындысы бойынша, игерілмеген 16,9 млрд теңге орын алмай қалған байқаулардың қаражаты, яғни байқаулар уақытылы өткізілмеген немесе кейінге қалдырылған. Сондай-ақ, 6,9 млрд теңге норвативті-құқықтық актілердің уақытылы қабылданбауынан игерілмеген", – деп атап өтті министр.

Соңғы жаңалықтар