Дәрігерлер диагнозын таба алмаған 11 айлық сәби шетінеп кетті

1-ші тамыз күні құсық және іші өту белгілері болған Нұрайым Мұқаттың анасы облыстық жұқпалы аурулар ауруханасына ішек инфекциясы деген диагнозбен түседі. 7-сі күні  сауығып шыққан бала екі күннен кейін дәл осы ауруханаға жатқызылады. Дәл осы уақытта анасы үш айлық баласын түсіріп алып, ауруханаға жатқызылған, деп хабарлайды Stan.kz.

Екінші рет дәрігерлер аталған ауруға система және Цеф-3 антибиотигін еккен. Анасы Құралай Кәрімтаеваның айтуынша, бала ауруханаға түскенде рентген сараптамасы жасалмаған. Тек таныстар іздеп, ортаға адам салғаннан кейін ғана баланың өкпесі түсірілген.

«11-ші күні біз екінші рет түскенде ғана рентгенге түсірді. Бронхит деген қорытынды шығарып, тағы да Цеф – 3 дәрісін екті. Алдыңғы бір апталық ем қабылдағанда да дәл осы дәріні берген болатын. Қатты дәрі болғандықтан, жоқ дегенде 7 күн егу керек. Олар менің балама 20 күн салып шықты. 26 күні баланы жақсы деп бізді ауруханадан шығарды» - дейді қайғырған ана.

Арада он күн уақыт өткен соң баланың ыстығы көтеріліп, қайтадан жедел-жәрдем шақырған. Бұл жолы Нұрайымға ангина деген диагноз қойылған. Үшінші рет ауруханаға жүгінген ана баласына басқа дәрі салуын өтінген.

«Мен айттым басқа дәрі ауыстырыңыздар. Біз бұл Цеф-3 дегенді алғанбыз деп. Алайда, «сіздерде суық бар» деген дәрігер керісінше, дәрінің мөлшерін ұлғайтты. Бірақ, температура түспеді. Рентгенге түсіруін де өтіндім. Бұл жолы оны маған жасамады. Халі нашарлағанда рентгенге түсіріп, жансақтау бөліміне алып кетті. Сол кезде екі жақты пневмония деп диагноз қойды», - дейді анасы.

Баланың ауруы асқынып кеткенін жансақтау бөлімінің дәрігерлері де білген. Баласынан айырылып қалған анаға «дәрігерлердің кінәсі – бізге кешіріктіріп алып келген» деген.

Аталған фактіге байланысты облыстық аурулар ауруханасы директоры жас маманның емдеу жұмыстарын жүргізгенін мойындады. Алайда, анасы айтқандай емес, бірінші түскенде рентген сараптамасын жасаған деп ақталды.

«Бірінші рет түскенде рентгенге түсірдік. Бронхит диагнозын қойдық. Үшінші рет түскенде балада ангина болды. Баланы емдеген биыл келген жас маман. Ол бөлім меңгерушісінің қадағалауымен ем-шараларын жүргізді. Бірақ, бала іріңді ангина диагнозымен түсті. Дегенмен, уақыт өткеннен кейін барлығымыз пневмония сол кезде басталғанын түсінеміз. Түскенде пневмонияның белгілері анық болған жоқ. Дәрігерлер дене қызуының көтерілуін іріңді ангинамен байланыстырды. Рентгенге түсіру үшін ешқандай көрсеткіштер болған жоқ», - деген Гүлмира Бекзатова қазіргі таңда тексерістер жүріп жатқанын және 11-ші қазаннан кейін сараптама қорытындысы болатынын алға тартты.

Ал, Нұрайым Мақаттың ата-анасы кінәлі адамдарды жазалауға барын салып жатыр. Тіпті, прокуратураға да арыз-шағымдарын жіберген.

Айта кетейік, 2018 жылдың 3 қаңтар айында дәл осы ауруханада үш жасар Айзере Қақарманова да көз жұмған болатын. Жансақтау бөлімінде жан тапсырған бөбектің ісі бүгінде тоқтатылған. Себебі, өлімге қатысты тергеудің себебі анықталмаған көрінеді