Денсаулық 20.08.2020 сағат 15:40

QazCovid вакцинасын сынауға еріктілер қажет

Сынақ жұмыстары қазанда басталады. Екпе 200 еріктіге салынады деп жоспарланып отыр.
QazCovid вакцинасын сынауға еріктілер қажет
фото: qazaq1913.com
Бөлісу
Бөлісу
Бөлісу

Дәрілер мен медициналық сараптау ұлттық орталығы коронавирусқа қарсы қазақстандық QazCovid-in вакцинасының клиникаға дейінгі зерттеулерінің сәтті аяқталғанын мәлімдеді. 

Абай.кз сайтының жазуынша, бұл туралы орталықтың ресми сайтында жарияланған.

Орталық «жануарларға вакцинаның күшейтілген дозасы салынып, оның қауіпсіздігі мен уытты әсері мұқият тексерілгенін» және «ағзаға аллергиялық реакциясының жоқтығы анықталғанын» хабарлады.

Вакцина сынағының екінші кезеңін қазанда бастамақ және екпе 200 еріктіге салынады деп жоспарланған.

Қазір әлемде коронавирустың жаңа түріне қарсы жүзден астам вакцина сынақтап өтіп жатыр. Бұған дейін Қазақстанда Ресей билігі тіркеген, бірақ ДДСҰ күмән келтірген «Спутник» вакцинасы көп талқыланды. ДДСҰ ресейлік вакцинаның барлық сынақ кезеңінен өткеніне сенбейді. Мәскеу бұл күдікті жоққа шығарып отыр.

12 тамызда Қазақстан президенті Қасым-Жомарт Тоқаев күзде Ресейге вакцинаны сатып алу бойынша келіссөз жүргізуге делегация жіберетінін айтқан. Бұл қоғамда үлкен талқы тудырып, кейін Қазақстан денсаулық сақтау министрлігі барлық сынақ кезеңінен өтпеген вакциналарды алмайтынын мәлімдеген. Елдің бас санитарлық дәрігері Айжан Есмағамбетова Қазақстан нарыққа алғаш түскен вакцинаны сатып алатынын айтқан.

Тамыздың басында министрлік вакцина шықса, халықтың 11,5 пайызына - созылмалы дерті бар адамдарға, індетпен күресетін дәрігерлерге, вирус жұқтырса қауіп тобында болатындарға - тегін екпе салатынын мәлімдеген. Ведомство «халықтың қалған бөлігі вакцинаны өз қаржысына салдыру керек» деді. Яғни, екпенің төлемі Медициналық сақтандыру қорынан (МСҚ) төленбейді.

МСҚ - халықты тегін медициналық көмекпен қамтамасыз ету үшін құрылған қор. Биылдан бастап ресми жұмыс істейтіндер мен өзін-өзі жұмыспен қамтығандар ай сайын жалақысының бір бөлігін осы қорға аударып келеді.
 

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар