СҚО-да 269 адам құс тұмауы бойынша байланыста болған

Солтүстік Қазақстан облысында санитарлық дәрігерлер 269 адамды құс тұмауы бойынша байланыста болғандар деп тапты, деп хабарлайды Skifnews.kz ақпарат порталы.

«Олар – ауру құстарды қараған немесе қырылған құстарды жинау және жою жөніндегі зооветжасағы құрамында жұмыс істегендер», - деп мәлімдеді жұма күні СҚО тауарлар мен қызметтер сапасы мен қауіпсіздігін бақылау департаменті басшысының орынбасары Татьяна Горлова.

Ол атап өткендей, адамдар құстан ауру жұқтыруы мүмкін, бірақ, вирус адамнан адамға жұқпайды.

«Құс тұмауы адамдарда кез келген тұмауға ұқсас вирусты респираторлы инфекция тәрізді жүреді: көзден жас ағу, мұрын бітелу, жөтел және т.б. Емделген жағдайда, үш-төрт күнде жазылуға болады», - деді Горлова.