«Карантинге қатысты жаңа қаулы шығады» - Бекшин

Алматының бас санитария дәрігері жаңа қаулы әзірленіп жатқанын айтты, - деп хабарлайды Tengrinews.kz Жандарбек Бекшиннің айтуынша, қазіргі уақытта Қазақстанның бас санитария дәрігерінің жаңа қаулысы дайындалып жатыр. Құжаттың соңғы нұсқасымен алматылықтар ертең кешке, 30 шілдеде таныса алады.

"Бұл қаулы биыл 2-16 тамыз аралығында әрекет етеді. Осы құжат бойынша көп ұстанымды кәсіпкерлер қауымдастығы, "Атамекен" ҰКП, кәсіпкерлік басқармасымен талқыладық. Бағытты талқыладық. Бірақ  түпкілікті ұсыныстар мен талаптарды күтеміз. Әсіресе, Ashyq жүйесі бойынша жұмыс істемейтін нысандардың қызметін шектеуіміз керек", - деді Бекшин.

Ол 2 тамыздан бастап Ashyq жүйесі бойынша жұмыс істемейтін кейбір нысан қызметін тоқтататынын айтты. Шектеулер екі апта бойы жарамды болады.

Бұған дейін Алматының бас мемлекеттік санитария дәрігері Жандарбек Бекшин қаладағы коронавирусқа байланысты жағдай күрделеніп бара жатқанын айтқан болатын.