Шымкентте «Мектепке жол» акциясы аясында 30 мың балаға көмек көрсетілді

Бүгін Шымкенттегі дендросаябақта республикалық «Мектепке жол» акциясы өтті. Елімізде биыл тоғызыншы рет ұйымдастырылып отырған шараға қала әкімі Ғабидолла Әбдірахымов, қалалық мәслихат депутаттары, «Нұр Отан» партиясының өкілдері, білім және тәрбие беру ұйымдарының басшылары мен ұстаздар қауымы қатысты.

Елбасының оқушылардың мектепке толық баруын қамтамасыз ету туралы тапсырмасына сәйкес, акция аясында Шымкенттегі білім мекемелерінде әлеуметтік көмекке мұқтаж балаларға көмек берілді. Айтулы шара ел тәуелсіздігінің 25 жылдығына арналып отыр.

Акция барысында қаланың 29644 оқушысына қолдау көрсетілді. Оның ішінде: жалпыға міндетті білім қорынан 5000 баланың есеп-шоттарына 12000 теңгеден, барлығы 60 млн. теңге аударылған болса, қала әкімінің демеушілігімен 100 бала мектеп сөмкесімен қамтылатын болады. Бұл туралы Оңтүстік Қазақстан облысы әкімдігінің баспасөз қызметі хабарлап отыр.

Статистикалық мәліметтерге сүйенсек, қаламызда әлеуметтік көмекке мұқтаж 29644 бала есепке алынған. Осыған орай, қала әкімдігінің қолдауымен көп балалы отбасынан шыққан 18007 оқушыға, 385 жетім және жартылай жетім 5080 балаға, 979 мүгедек, 5166 аз қамтылған отбасы балалары мен 47 оралман отбасының балаларына көмек көрсетілді.

Осылайша, акцияға қала әкімдігі, жеке кәсіпкерлер, мектеп әкімшілігі қолдау көрсетіп, жетім және ата-ана қамқорлығынсыз қалған балаларға қамқор болып, олардың әлеуметтік себептер салдарынан мектепке бара алмауының алдын алды.