ОҚО-ның индустриалдық аймақтарында 4 мың жаңа жұмыс орны ашылған

Оңтүстік Қазақстан облысының индустриалды аймақтарында 4025 жаңа жұмыс орындары ашылған. Бұл туралы бүгін өңір басшысы Бейбіт Атамқұлов облыстық мәслихаттың кезектен тыс төртінші сессиясында мәлімдеді.

Бүгінде облыс аумағында 7 индустриалдық аймақ табысты жұмыс істеуде. Олар Шымкент, Кентау, Түркістан қалалары мен Созақ, Түлкібас, Мақтарал, Казығұрт елдімекендерінде орналасқан. Сонымен қатар, дәл осындай 4 аймақтың инфрақұрылымдарының құрылысы жүргізілуде.

- «Индустриалды-инновациалық даму» бағдарламасы аясында 27 млрд. теңгеге 16 жобаны іске қосып, 845 жұмыс орнын құру жоспарланса, жыл басынан 2 жоба іске қосылып, 74 жұмыс орны ашылды, - деді Б.Атамқұлов депутаттар алдында оқыған баяндамасында.

Сондай-ақ, 6 айда өнеркәсіп кәсіпорындарымен 384 млрд. теңгенің өнімі өндіріліп, 5,3% артты. Өсім бойынша облыс республикада алдыңғы қатарда.