$ 444.22 € 476.38 ₽ 4.82
Бұл туралы Оңтүстік Қазақстан облысының әкім Бейбіт Атамқұлов облыстық мәслихаттың депуттарымен өткен есепті кездесуде мәлімдеді. Онда облыс әкімі өңірде І жартыжылдықтың қорытындысымен ауыл шаруашылығының өнім көлемі 123 млрд. теңгені құрап, 2 пайызға артқанын айтты. Ал егіс көлемі өткен жылдан 13 мың гектарға артып, 788 мың гектарды құраған.
Есепті кездесуде мәлім болғандай аграрлы аймақтың шаруалары осы жылы дәндік жүгеріден 108,4 мың тонна, көкөністен 811 мың тонна, бақшадан 1 252 мың тонна, картоптан 195 мың тонна, масақты дақылдардан 470 мың тонна өнім жинаған. Сондай-ақ, облыста алғаш рет бидайдың орташа өнімділігі 22 центнерді құрап, рекордтық өнім алынып отыр. Ал, диқандар болса өздерінің осынау жетістіктерін ел тәуелсіздігінің 25 жылдығына арнағанын бұған дейін мәлімдеген болатынбыз.
Сондай-ақ, жиында аймақ басшысы тамшылатып суғару әдісі қосымша алты мыңға жуық гектарға ендіріліп, жалпы көлемі 49,7 мың гектарға, ал жылыжайлар қосымша 72 гектарға салынып, жалпы 1 098 гектарға жеткенін айтты. Айта кетейік, жалпы еліміз бойынша жылыжайлардың 87% Оңтүстік Қазақстан облысының үлесінде. Осы жылыжайлардан 80 мың тонна көкөніс өнімдері жиналды.
Сондай-ақ, облыс диқандары биыл бау-бақша өнімдерінің басым бөлігін солтүстік облыстар мен көрші Ресейге экспорттағанын да айта кеткен жөн.
