$ 444.22 € 476.38 ₽ 4.82
Елордалық билік өкілдері қаладағы азық-түлік бағасының қымбаттағанын мойындады. Бірақ, қымбатшылықтың ЭКСПО көрмесінің өтуіне еш қатысы жоқ екенін, мезгілге орай бірқатар азық-түлік тауарлары қорының азаюына байланысты екенін айтып отыр.
Басқарма мамандарының күн сайын азық-түліктің негізгі түрлеріне мониторинг жүргізуі барысында мамырда сарымсақ бағасы (41,9%) қымбаттағанын, ал қырыққабат (19,8%), сәбіз бағасы (18,2%) өскені байқалған.
Көтерме өнім ұсынушылардың мәліметінше, мезгілге байланысты бұл тауарлар қорының азаюымен байланысты болып отыр.
Жетіспеушіліктің салдарынан Ақмола облысынан әкелінетін картоптың сату құны 92%-ға өскен, пияз (ОҚО) 80%, сәбіз (Павлодар, Қырғызстан) 57%, қырыққабат (Ақмола облысы) 69% көтерілген.
Қалалық ауыл шаруашылығы басқармасы азық-түлік бағасының негізсіз өсуін болдырмау бағытында іс-шаралар жүргізуде.
-Егер баға өскені туралы ақпарат болса, бірден Астана қаласы бойынша табиғи монополияларды реттеу және бәсекелестікті қорғау департаментіне жіберіледі. Жыл басынан бері 5 мәлімет жіберілген. 19 наурыздан апта сайын 20 жәрмеңке ұйымдастырылды. Онда 31 тонна өнім саудаланды. 6 рет аймақтық жәрмеңке өткізілді (Жамбыл, ОҚО, БҚО, Атырау), шарада 754 тонна өнім сатылды, - деп хабарлайды Астана қаласының ауыл шаруашылық басқармасы.
Бұдан бөлек, Астанада сауда тауарларының тұрақтандыру қорын құру бойынша шаралар жүргізілуде. Оған бағасы қымбаттау қаупі бар тауарлар сатып алынады. Мәселе үнемі қатаң бақылауда.
