$ 448.15  483.46  4.86

Б.Сағынтаев Алматыдағы ШОБ нысандарының жұмысымен танысты

Бүгін Алматыға жұмыс сапарымен келген ҚР Премьер министрі Бақытжан Сағынтаев шағын және орта бизнес өкілдерінің ірі өндіріс нысандарын аралап көрді. Мақсат – бизнес ортаны түбегейлі жақсарту және кеңейту бойынша Мемлекет басшысының тапсырмаларын орындау барысымен танысу. Бұл туралы Үкімет басшысының баспасөз қызметі хабарлап отыр.

Бірінші кезекте Бақытжан Сағынтаев «Magnum Cash&Carry» ЖШС аралап, онда сауда желісінің қызметімен танысты. Премьер-Министр шаруашылық және азық-түлік тауарларының, нан-тоқаш, кондитерлік өнімдер, жеміс-көкөніс және ет-сүт өнімдері секцияларын аралап көріп шықты. Өз кезегінде «Magnum Cash&Carry» басшысы Александр Гарбер жергілікті өндірушілердің өнімдерін өткізуге және әлеуметтік маңызы бар тауарлардың бөлшек сауда бағаларын қалыптастыруға қатысты түсініктеме берді.

«Magnum Cash&Carry» Қазақстандағы 2007 жылы құрылған бөлшек сауда желісі. Айта кеткен жөн, Алматыдағы ауданы 7 мың м² болатын бір сауда орталығынан бастап тоғыз жылда желі еліміздің бес қаласындағы 28 дүкенге дейін өсті. Компанияның мәліметінше, Алматыдағы өркениетті сауданың бөлшек сауда нарығындағы оның үлесі — 50% жуық. Желі дүкендеріндегі сатып алушылардың күн сайынғы ағымы орта есеппен алғанда 61 мыңнан астамды құрайды. Қазақстандық қамту тауарларының үлесі — маусымға байланысты 42-47%.

Бұдан кейін ҚР Премьер-Министрі «ЭФКО Алматы» ЖШС май өнімдерін өндіретін кәсіпорынға барып, май өндіру кешенін қайта құру мен жаңғыртуды тексерді. Айта кеткен жөн, өткізілген жаңартуға сәйкес компания жоғары әлемдік стандарттарға сай май және маргарин өндірісін реттей алды. Бұл республикалық ішкі қажеттіліктерді қамтып қана қоймай, Орталық Азия елдері мен Қытайға жеткізуді бастауға мүмкіндік берді, ал Қазақстанның мәртебесі май өнімдерін «нетто-импорттаушыдан» «нетто-экспорттаушыға» өзгерді.

Инвестициялар көлемі 11 млрд теңгеден асқан «ЭФКО Алматы» май кластерін құру бойынша жобасын сәтті іске асырған соң, ол Алматының Индустрияландыру картасына және «Бизнестің жол картасы – 2020» бағдарламасына енгізілді.

Компанияның басшысы Нұржан Қожамұратовтың айтуынша, күрделі макроэкономикалық жағдайға қарамастан, кәсіпорын май өнімдері өндірісі мен экспорты көлемін арттырады, бұл Қазақстанға 2025 жылға қарай оның Орталық Азиядағы жеткізушісі болуға мүмкіндік береді.

Алматыға жұмыс сапары аясындағы аралаған келесі нысан әскери техника әзірлеу, өндіру, жөндеу, жаңғырту және қаруландыру бойынша кәсіпорын — «Алматыэнергосервис» ЖШС болды, онда Бақытжан Сағынтаев өндіріс процесімен танысты. Онда заманауи тәсіл қолданылады: прототиптеу мен өндірудің инновациялық әдістері, жеке 3D-зертхана, аддитивті технологиялар енгізу және пайдалану.

Кәсіпорын өнімдері тек қана Қазақстанда ғана емес, сондай-ақ Ресей, Вьетнам, БАӘ, Бангладеш және Суданда сұранысқа ие. Айта кеткен жөн, компания Индустрияландырудың республикалық картасына енгізілген. Бұдан өзге, ол Кәсіпкерлікті қолдау картасының және «БЖК – 2020» қатысушысы болып табылады.

Бүгінгі таңда Үкімет Мемлекет басшысы жариялаған Экономиканы үшінші жаңғыртуды іске асыруға бизнесті тарту бойынша кешенді жұмыс жүргізеді. Бұл жұмыс бірінші кезекте экономиканың барлық басым салаларында цифрлық технологияларды кеңінен енгізуді және бизнестің пайдалануын көздейді.

Атап айтқанда, бұл бағытта кәсіпкерлерге арналған сәйкес ынталандырулар жүйесін құру жұмысы жүргізіліп жатыр, олардың ішінде нормативтік базаны жетілдіру, кәсіпорындарды цифрлық трансформациялау үшін шығындарды азайту, цифрлық жобаларға инвестициялар тарту үшін қолайлы жағдай жасау бар.

Сонымен қатар, Үкімет жаңа мемлекеттік бағдарламалар аясында бизнесті қолдау бойынша жұмысты жалғастыруда: АӨК дамыту мен өнімді жұмыспен қамтуды және жаппай кәсіпкерлікті дамыту бойынша, олар сондай-ақ жеңілдікті несиелендіру түрінде бизнесті қолдау құралдарынан тұрады.

Осы ретте айта кету керек, Алматы бойынша бөлшек сауда тауар айналымының көлемі 4% өсті және 1 752,7 млрд теңгені құрады. Барлығы қалада шағын кәсіпкерліктің 263 660 субъектісі тіркелген, бұл өткен жылғы көрсеткіштен 7,7% жоғары. ШОБ-тің қазіргі субъектілерінің саны 173 377 құрайды, бұл 2016 жылдың осы кезеңімен салыстырғанда 5,7% артық. ШОБ-те жұмыспен қамтылғандардың саны 2017 жылғы ІІ тоқсанында 572,5 мың адамды құрады, бұл өткен жылғы көрсеткіштен 0,5% жоғары.

2017 жылдың II тоқсанында шығарылған ШОБ өнімдерінің көлемі өткен жылдың осы кезеңімен салыстырғанда 20,7% өсіммен 2 346,9 млрд теңгені құрады.

2017 жылы «Бизнестің жол картасы – 2020» бизнесті қолдау және дамытудың бірыңғай бағдарламсын іске асыруға 4,4 млрд теңге бөлінді. Барлығы бағдарлама бойынша 205 жоба мақұлданды, олардың 107 жобасы субсидиялау бойынша, 33-і — кепілдік беру бойынша, 65 — гранттар бойынша.

«Жібек Жолы» бағдарламасын іске асыру аясында жалпы 4 млрд теңге сомаға 66 жоба қаржыландырылды, 818 жұмыс орны сақталды, құру жоспарланған — 202. Жаңартпалы негізде бірінші кезең (2015 жылы) қатысушыларына қайтарылған қаражат есебінен 2,2 млрд теңгеге 37 жобаға қосымша қолдау көрсетілді. 2017 жылы бағдарламаны іске асыруға 2,7 млрд теңге бөлінді.

Сондай-ақ, жергілікті бюджеттен «Алматы – Өнім», «Алматы – Инновация» және «Алматы – Туризм» өңірлік бағдарламаларын қаржыландыруға қаражат бөлінеді.

Сіздің реакцияңыз?
Ұнайды 0
Ұнамайды 0
Күлкілі 0
Ашулы 0

Серіктес жаңалықтары