$ 480.55 € 533.75 ₽ 5.36
Оңтүстік Қаақстан облысы Бәйдібек ауданының орталығы Шаян елдімекенінде жыл басынан бері тындырымды тірліктер атқарылып, ауылдың ажары арта түсті. Қолға алынып отырған осынау игі шаралар ел тәуелсіздігінің 25 жылдығына арналуда.
Атап айтқанда, Шаяндағы ұзындығы 6,2 шақырым болатын 15 көше асфальтталып, пайдалануға берілді. Автокөліктерге арналған 6 көше кеңейтіліп, 7 жолға (ұзындығы 3,5 шақырым) жаңадан аяқжол (тротуар) төселді.
Аудан орталығының сәулеттік келбетін жақсарту жұмыстары мұнымен тоқтаған жоқ. Абаттандыру жұмыстарын жүйелі қолға алудың нәтижесінде, көше бойындағы жиектер (бордюрлар) жаңартылып, су ағатын арықтар орнатылды.
Бәйдібектегі орталық көшелер де жаңарған. Онда бүгінге дейін 10 орталық көшенің қақпасы (арка) жаңадан орнатылып, 10 гүлзар бой көтерді. Мұнан бөлек, мекемелердің алдында автокөліктерге арналған 10 автотұрақ салынды.
Сондай-ақ, аталған елді мекен көшелерін көркейтіп, көгалдандыру жұмыстары да қарқынды жүргізілді. Мәселен, жыл басынан бері аудан орталығының орталық көшелеріне 2500 түп ағаш отырғызылып, 7 мың дана раушан гүлі мен 13 мың түп гүлді өсімдіктердің түйнектері егілді.
Айта кетейік, Тәуелсіздіктің 25 жылдығына орай дәл осындай абаттандыру жұмыстары Оңтүстік Қазақстан облысының барлық аудан-қалаларында жүргізіліп жатыр. Облыс орталығы Шымкенттің өзінде қалаішілік жолдардың ұзындығы 500 шақырымға ұзарса, Түркістанда жолдармен бірге аялдамалар да жаңартылып жатыр.
