Оңтүстік Қазақстан облысында анасы өлімші етіп сабап тастаған 7 жасар бала өмірінің соңына дейін мүгедек боп қалады. Соққылардың ауыр болғаны сонша, оның миында ісіктер пайда болған. Дәрігерлер оны өлім аузынан аман алып қалды деп жазады Otyrar.kz.
Қазір жеткіншек облыстық аурухананың жансақтау бөлімінде жатыр. 20 күннен бері есін жимаған баланың жағдайын дәрігерлер әлі де болса ауыр күйде дейді.
Бұл оқиғаға бүгінде полицейлер араласып, қылмыстық із қозғады. Тергеу барысында белгілі болғаны, 1986 жылғы әйел өзінің жалғыз ұлын әбден ұрып, денесін күйдірген. Оқиға Ордабасы ауданының орталығы Темірлан елдімекенінде орын алыпты. Дәрігерлерге күдікті әйел баласының құлап түскенін айтып алдамақ болған. Алайда, денедегі жарақаттарының адам қолынан болғанын бірден білген ақхалаттылар дереу тәртіп сақшыларына хабар беріпті.