Ақтөбеде ұсталған "діндарлар" мешіт тонап, қыз зорлаған

2017 жылдың басынан бері Ақтөбе облысында теріс діни ағымдардың жетегінде жүрген 23 адам ұсталған деп хабарлайды "Мой Город" порталы облыстық ІІД-нің баспасөз қызметіне сілтеме жасап.

"Ұсталғандар қыз зорлау, зорлық әрекеттерін көрсету, заңсыз бас бостандығынан айырып еңбекке жегу, ұрлау, тонау, соның ішінде мешітте ұрлық жасау сынды қылмыстар жасаған", - дейді полицейлер.

Ұсталған "діндарлардан" 6 дана қару мен граната және үлкен көлемде діни әдебиеттер тәркіленіп алынған. Діни ағымдардың 212 мүшесі қоғамдық тәртіпті бұзғаны, миграциялық заңнаманы сақтамағаны үшін жауапқа тартылыпты.

Былтырғы лаңкестік оқиғадан бері ҰҚК өкілдері облыс аумағында 20 радикалды топтың жолын кессе, 72 "діндар" экстремистік, терроистік қылмыстар жасағаны үшін сотты болған.