Исламда балаға дұрыс ат қою – ата-ананың бала алдындағы парыздарының бірі. Алайда, қазақ халқының басым көпшілігі өздерін мұсылман санағанымен, дәл осындай парыздың бар екенін кейбірі білмейтін секілді. Оны ұл-қыздарына қойған есімдерге қарап аңғаруға болады.
Мәселен, бұған дейін елімізде ұл-қыздарына Саммита, Олимпиада, Ханшатыр, Азиада секілді қисынсыз есім берген тұрғындар кездесетін. Бүгін олардың қатары тағы бір адаммен толығыпты. Астана қалалық АХАЖ-дың мәліметінше, елордалық тұрғын жаңа туған сәбиіне Бәйдібэкспо деген ат берген көрінеді. Яғни, Бәйдібек пен ЭКСПО атауларын біріктіріп, осындай есім шығарған болуы керек.
Жалпы, қаңтар-қазан айларында Астанада 25 735 сәби дүниеге келген. Ұл балалардың көбіне Әлихан, Айсұлтан, Алан, Арлан секілді есімдер берілсе, қыздар арасында София, Амира, Кәусар, Елдана деген аттар көп кездеседі.