Алматыда ұзақ уақыт бұрын жабылып қалған «Алматыбасжоспар» ғылыми-зерттеу институты қайта құрылды

Атап өтерлігі, мұндай институт алып шаһарда осыдан бірнеше жыл бұрын жұмыс істеген. Кейіннен қызметін тоқтатыпты. Оны қайта құру қажеттігін мемлекет басшысы Нұрсұлтан Назарбаев Алматыға іс-сапармен келгенде айтқан болатын.

Бүгінде қайта құрылған ұйымның міндеті қандай? Бұдан кейін қаланы қандай өзгерістер күтіп тұр? Бұл сұрақтарға жауапты және ұйым туралы өзге де маңызды мәліметтерді «Алматыбасжоспар» ғылыми-зерттеу институты директорының орынбасары Жанат Айтілеу айтып берді.

«Қаланың бас жоспарын жасау мекемесі Кеңес дәуірінен бастап құрылған болатын. Біз егемендік алған жылдары бірнеше жыл жұмыс істеп, жабылған болатын. Алматы қаласы – үлкен қала. Бас жоспарын жобалау – күрделі жұмыс. Сондықтан бірізділік, сабақтастық болу үшін бір жобалау мекемесін дайындау керек болды. Сол үшін мемлекет басшысының тапсырмасымен бұрын жабылған мекеме қайта жанданып, қазір қайта ашылып жатыр», - дейді Жанат Айтілеу.

Оның айтуынша, Алматыға қазір мұндай ұйым ауадай қажет. Өйткені, қала соңғы уақытта тым үлкейіп кеткен. Бей-берекет салынған тұрғын үйлер, ғимараттар да көп. Олардың бәрін ретке келтіру – «Алматыбасжоспар» ғылыми-зерттеу институтының міндеті.

«Қалаланың бас жоспарын қайта жаңғырту жұмыстары жүргізіліп жатыр. Бас жоспар мемлекет тарапынан бекітілуі керек. Сол турасында жұмыстар жүргізіліп жатыр. Әрине, қала кейінгі жылдары 2 есе үлкейді. Аумағы 70 мың гектардай болды. Соған байланыста қалада үлкен  жұмыстар жүргізіледі. Қалаға жаңадан қосылған 25 мыңдай гектар жер бар. Сол аумақтардың дамуын, қаланың деңгейіне дейін көтеру керек. Сол жөнінде қалалық әкімдік үлкен жұмыстар жүргізіп жатыр. Алматы қаласының орталығында да атқарылуы керек жұмыстар бар. Ескі құрылыстар бар. Оларды сүріп, жаңадан ғимараттар салу керек. Орталық аумақтардағы ескі ғимарттардың орнына қайта жаңғыртылулар жүргізіледі. Бұл жұмыстар бас жоспарда ескерілетін болады», - дейді институт директорының орынбасары.