Қазақстан билігі Мұхтар Әблязовке бола Telegram мессенджерін бұғаттап тастауы мүмкін

Егер Telegram мессенджерінен Мұхтар Әблязовке тиесілі "Қазақстанның демократиялық таңдауы" қоғамдық қозғалысының материалдары толықтай өшірілмесе Қазақстан билігі аталған мессенджерді ел аумағында толықтай бұғаттап тастауы мүмкін. Бұл туралы Ақпарат және байланыс министрі Дәурен Абаев мәлімдеді деп жазады РИА Новости.

Министрдің айтуынша, Telegram иелеріне ресми ескерту жолданған. Онда сот шешімімен экстремистік ұйым деп танылған ҚДТ-нің материалдарын өшіру немесе Қазақстан азаматтары үшін оған қолжетімділікті шектеу талап етілген екен.

Қазіргі таңда ескерту хаты Telegram мессенджері әкімдігінің қарауында жатыр. Егер олар біздің сот шешімін орындамайтын болса мессенджерді Қазақстан аумағында толықтай бұғаттап тастаймыз", - деді Абаев.

Еске салайық, наурыз айының ортасында Астанадағы Есіл аудандық соты тіркелмеген ҚДТ ұйымын экстремистік ұйым деп тауып, Қазақстан аумағында оның әрекет етуіне тыйым салған болатын. Бұл ұйымды елден қашып кеткен банкир Мұхтар Әблязовтың құрғаны белгілі. Бас прокуратураның мәліметінше, Әблязовтың мақсаты - Қазақстан билігін құлатып, басып алу.