Талдықорған инфекциялық балалар ауруханасында үш жасар бала қайтыс болды. Бұл туралы менингикоккты инфекция профилактикасының мәселесі айтылған брифинг барысында белгілі болды деп жазады Tengrinews.kz.
2015 жылы туған нәресте мамырдың 28-не қараған түні қатты ауырған, оның дене қызуы көтерілген.
28 мамырда 15:40-та ол ауруханаға менингококк инфекциясы, менингит диагнозымен жатқызылған. Сол күні кеште бала қайтыс болды.
"Баланың менингиттен қайтыс болды деп нақты айта алмаймыз, себебі қазіргі уақытта сараптама жүргізіліп жатыр. Баламен байланысқа түскен адамдар, ата-анасы және басқа да адамдар инфекциялық ауруханаға жатқызылды. Осы оқиғаға дейін ол басқа өңірде болған. Онымен байланыста болғандардың барлығы бақылауға алынды. Превинтив емдеу жүргізіліп жатыр", - деді өңірлік инфекциялық ауруханасының бас дәрігері Бауыржан Сауранбаев.