Алматы қаласының Өңірлік коммуникациялар қызметі алаңында өткен брифингте шаһардағы Репродуктивті медицина институтының гинеколог-репродуктологі Л.Айтқожина сәби сүйгісі келетін ерлі-зайыптыларға қалай қуаныш сыйлап жүргендері туралы айтты.
Ләззат Кенжебайқызының айтуынша, заманауи техникалармен жабдықталған аталмыш институт емхана ғана емес, сондай-ақ, медициналық ЖОО студенттері мен курсанттары үшін оқу базасы болып табылады. Орталықтың дәрігерлері қазіргі таңда жетілдіру курстарының оқытушы тәлімгерлері ретінде де қызмет етеді. Сол үшін олар әлемнің ең жақсы емханаларында оқып, білімін жетілдіріп, кәсіби шеберліктерін үнемі жетілдіріп отырады.
– Біз бедеулікті емдеудің заманауи әдістерінің көмегімен емделушілерімізге ата-ана болу бақытын сезінуге жәрдемдесіп, Қазақстандағы демографиялық мәселенің шешілуіне де септігімізді тигіземіз. Ұрықтандыру – «зергерлік өнер», сондықтан эмбриондармен барлық ем-шаралар микроаспаптарды қолданып зор ұлғайтумен жасалады. Ұрықтандыру және қалыптасу кезеңінде эмбрионды ешкім көре алмайды, мамандар эмбриологиялық зертханада дамудың барлық сатыларын қадағалап отырады. Сондай-ақ, зертханада мұздатылған биологиялық материалды: эмбриондарды, шәует жасушаларын, ооциттерді, овариалды және тестикулдық тінді сақтайтын қойма бар. Эмбриондарды мұздатып сақтау – бұл балалы болған, бірақ тағы бала сүйгісі келетін ерлі-зайыпты үшін маңызды резерв, – деді спикер.
Жемісті еңбек пен емдеу сәттілігінің жоғары көрсеткіштерінің нәтижесі ретінде емхана тегін медициналық көмек шеңберінде мемлекеттік тапсырыстардың үштен бірін орындайды. Бұл – квота бөлінетін экстракорпоралды ұрықтандыру (ЭКҰ) бағдарламалары және лапароскопиялық операциялар. 2010 жылдан бері мұқтаж жандарға үкімет квота беріп келеді. Дегенмен, өткен жылғы статистикалық мәліметке сүйенсек, еліміздегі отбасылардың 16%-ы бала сүйе алмай отыр. Мәселен, бір жылда шамамен 150 мың неке тіркелсе, оның 16%-ы, яғни 20-21 мың жұп – баласыз. Сонда орта есеппен жылына 6500 жұп ЭКҰ жасатады. Ал былтырмен салыстырғанда, биылғы квотаның саны сәл көбірек.
– Биыл Қазақстан бойынша 900 мемлекеттік квота бөлінді. Бұл мұқтаж жұптардың тек 17%-ын ғана қамтиды. Демек, әлі де аз деген сөз. Бүгінгі таңда бір ғана Алматы қаласы бойынша 1000-ға жуық ерлі-зайыпты ЭКҰ кезегінде тұр, – деді Л.Айтқожина.