Қазақстанда мүгедек жандарды жуынатын суы жоқ, төсегі ескі-құсқы шипажайларға емделуге жібереді

Мінберлерде «мүмкіндігі шектеулі жандарға барлық жағдай жасалып жатыр» дейтін министр шынайы ахуалдың шет-жағасын сезгендей болды. Астаналық Жұмабай Шүйтенов мүгедектігі үшін берілетін тегін шипажайға көңілім толмайды деп турасын айтты.

– Қотыркөл дегенге береді. Барамыз. Онда су да жоқ, ваннаға да түсе алмайсың. Ал төсек-орны қарасаңыздар, 41 жылғы соғыстан қалған сияқты, – дейді ІІ топтағы мүгедек Жұмабай Шүйтенов.

Ақсақалдың айтуынша, шипажайды таңдай алмайды екен. Тендерде ұтып, әкімдік бекіткен жерге баруға мәжбүр көрінеді. Министр бұл мәселені қойын дәптеріне түртіп алды.

Ал, қаны ұйымайтын аурумен ауырып, 10 шақты ота жасатқан Бақытжан Нұрқызова болса, шипажайға баратын жолдамама қол жеткізе алмай жүрмін деп шағымданды. Астанадағы шенеуніктердің үстінен арызданғаны өз алдына, Ақмола облысында мүгедектікті растайтын медициналық әлеуметтік сараптаманы сатып жатыр деді.

Айтылғандар министрдің көзін ашып, көңілін түсірген сияқты. Бұл салада бәрін бастан-аяқ өзгертеміз деп салды.

– Көкшетауға қатысты айтқан факттерді арнайы құрылған комиссия тексеретін болады. Соның негізінде лауазымды тұлғалар жауапқа тартылады. Жалпы айтпағым, біз бұл бағытта реформа жасап жатырмыз, – деді ҚР Еңбек және халықты әлеуметтік қорғау министрі Мадина Әбілқасымова.

Министрдің реформа дегені – бұдан былай мүгедектікті растау үшін медициналық әлеуметтік сараптауға барудың қажеті болмайды екен. Яғни, науқастың жағдайын анықтамаларға қарап, сырттай шешім қабылданбақ.

Дереккөз: 31-арна