$ 442.05 € 474.14 ₽ 4.74
Шымкенттік әйел көпқабатты үйдің 5-қабатынан құлап, тірі қалды. Оқиға 27 тамыз күні Терешкова көшесінде болған деп жазады Otyrar.kz.
Әйелдің тірі қалуына оның топырақты жерге құлауы себеп болса керек. Куәгерлердің айтуынша, құлаған жерден небәрі 1 метр қашықтықта асфальт болған екен.
«Ол бесінші қабатта тұратын және үнемі асханадағы терезесінің алдында отыратын. Жасы шамамен 45-те, бұған дейін инсульт алған. Мен біртүрлі дыбыс естідім де, дереу далаға шықтым. Ол дәл алдымда жерде жатыр екен. Көршілер дереу жедел жәрдем шақырды, дәрігерлер оны ауруханаға алып кетті», — дейді құлаған әйелдің көршісі.
Дәрігерлер науқастың халі ауыр деп отыр. Оның сүйектері сынып, басынан ауыр жарақат алған.
«27 тамызда сағат 12:56-да жедел медициналық жәрдем көрсету ауруханасына 1977 жылы туған әйел жеткізілді. Оны алып келген дәрігерлер 5-қабаттан секіріп кеткенін айтты. Бізге түскендегі жағдайы аса ауыр болатын. Сондықтан оны дереу жансақтау бөліміне жатқыздық. Миы шайқалған. Бас сүйегінің ішінде қан ұйып қалған. Қазір оны ота жасауға дайындап жатырмыз», — дейді аталған аурухананың күндізгі бөлім меңгерушісі Сәбит Байбосынов.
