«Әр жерде мүшеқап, балалар оны шар деп ойлайды»: Қызылорда тұрғындары жалға берілетін пәтерлер туралы айтты

Бұл ауданды «қызыл шамдар аймағы» деп атап кеткен. Аудан тұрғыны Татьянаның айтуынша, пәтер жалға беретіндер қызылордалықтар емес. Ақтөбе, Шымкент, Жезқазған және басқа да қаладан келгендер екен.

Осы жылдың ақпан айында клиенттің бірі терезеден құлап түскен. Оның шыққан даусынан төменгі қабатта ұйықтап жатқан 5 жасар қыз шошып оянып, содан бері тілінде ақау пайда болыпты. Наталья есімді тұрғынның айтуынша, бір апта бұрын кешкі сағат 22.00 шамасында пәтерден қыздардың шыңғырған дауыстары шыққан.

«Полиция қызметкерлері келіп тексерген. Сөйтсе, пәтерде 14-15 жастағы жігіттер мен қыздар бар екен. Олар қыздарды отырысқа шақырыпты», – дейді Наталья.

Анық болғандай, бұл пәтерлер жеткіншек жастағыларға дейін бір күнге жалға беріледі. Пәтерлердің бірінде бірнеше жігіт жабылып зорлап тастаған қыз да табылған кездер болған екен.

Ал жалға берілетін пәтерлер еш уақытта тазаланбайды. Клиенттердің кесірінен аудан тұрғындары зардап шегіп отырғандарын айтады. Көпқабатты үйлердің айналасынан инелер мен мүшеқаптар табылып жатады екен. Ал аулада ойнап жүрген балалар оны шар деп қабылдап, үрлемекші де болған.

Аудан тұрғындары полицияға бірнеше рет шағымданып, арыз да жазыпты. Алайда, еш нәтижесіз деп отыр. Керісінше, Қызылорда облыстық Полиция департаментінің басшысы аудан тұрғындардың өзіне 35 мың теңгеге күзетші алуды ұсынған.

«Пәтерді жалға берушілер ешқайда кетпейді. Бұл жақтан көшіп кетпекші болып, пәтерді сатқым келген. Бірақ бұл ауданның жағдайын бәрі біледі. Ендігіде өз пәтерімізді сата алмай отырмыз. Сағатына, күніне жалға берілетін пәтерлердің кесірінен бұл ауданда сатылымға берілетін үйлердің бағасы да арзандап кетті», – дейді аудан тұрғыны.