Шымкентте тәуліктік пәтерлерге рейд жүргізілді

Шымкент қаласының Әл-Фараби ауданына қарасты Республика, Ә.Жангелдин және Т.Айбергенов көшелеріндегі тәуліктік пәтерлерді жалға беру қазіргі таңда өзекті мәселелердің бірі болып тұр. Бұл жөнінде қала тұрғындары мен қонақтары тарапынан және бұқаралық ақпарат құралдарынан да наразылықтар айтылуда. Осыған орай, «Шымкент – қауіпсіз қала» жол картасы аясында және Шымкент қаласы әкімінің тапсырмасына сәйкес, Әл-Фараби ауданы әкімінің ұйымдастыруымен кезекті рет іс-шара жұмыстары өткізілді.

Іс-шара барысында аталған көшелерді 20 учаскелік полиция қызметкері және 6506 әскери бөлімінің «Ұлттық ұлан» сарбаздары тұрақты түрде бекітіліп, аралауды бастады. Сонымен қатар әрбір пәтер иесін анықтап, жол бойында кілт айналдырып тұрған 4 тұлғаға ҚР «Әкімшілік құқық бұзушылық туралы» кодексінің 449-бабына сәйкес хаттамалар толтырылды.

Аталған жұмыстар алдағы уақытта тұрақты түрде өз жалғасын табады. Бұл өз кезегінде қаланың дамуына, қауіпсіздігіне және санитарлық тазалығына септігін тигізетіні сөзсіз.

«SN.kz»-ақпарат.