Белгілі актриса 7 жылдан бері қарттар үйін паналап келеді

Алматыдағы Ғабит Мүсірепов театрында ұзақ жылдар бойы қызмет етіп, зейнетке шыққан Айымторы Тайғаринова қалай баспанасыз қалғанын айтып берді, деп хабарлайды Skifnews.kz ақпарат порталы.

Бұл туралы ол Qazaq Airan YouTube арнасына берген сұхбатында баяндады.

Айымторы Тайғаринованың жасы қазір 86-да, 7 жылдан бері қарттар үйін паналап келеді. 

"Үйімізді алып қойды. Мен жалғыз өзім далада қалдым. Үйімізде адвокат жігіт пәтер жалдап тұрды. Ол пәтерақы ретінде әр ай сайын 30 мың беріп тұратын. Кейін қағазға 30 мың теңге алып отырғанымды жазуды сұрады. Мен жазып бердім. Кейін пәтерім қолды болды. Ол не жасағанын, қалай жасағанын білмеймін. Ол әлгі үйді сатып алғандай болған ғой", - дейді кейуана.