Павлодардағы аулалардың бірінде кісі өлімі оқиғасы болды. Яғни, тұрғындардың бірін өз ауласында өлтіріп кеткен. Бұл ақпаратты Sputnik.kz-ке Павлодар облысы полиция департаменті растады.
Әлеуметтік желідегі ақпаратқа сәйкес, трагедия Естай көшесіндегі №134/1 үйдің ауласында болған. Осы үйдің тұрғыны көз жұмды деп хабарланып отыр. Полиция аумақты қоршауға алды.
"Өте керемет жан, отағасы, әке, ата еді. Әрқашан көмекке келуге дайын тұрды", - деп жазады желі қолданушыларының бірі.
"Оқиғаға қатысты қылмыстық кодекстің 99-бабы ("адам өлтіру") бойынша сотқа дейінгі тергеу басталды. Күдіктіні анықтау және ұстау шарасы жүргізіліп жатыр. Өзге ақпарат жарияланбайды", - деді өңірлік полиция департаменті баспасөз қызметінің жетекшісі Жанна Белялова.
Бұл бапқа сәйкес, кінәлі деп танылған адам 8 жылдан 15 жылға дейін бас бостандығынан айырылады.