Шымкент қаласындағы полиция департаменті өзіндік қауіпсіздік басқармасының жедел уәкілі алаяқтық жасағаны үшін сотталды. Бұл туралы Сыбайлас жемқорлыққа қарсы қызметке сілтеме жасап Skifnews.kz ақпарат порталы хабарлады.
Сыбайлас жемқорлыққа қарсы қызмет Шымкент қалалық полиция департаменті өзіндік қауіпсіздік басқармасының жедел әзірлемелер және арнайы іс-шаралар тобының жедел уәкілі Ф. Шәріпбайұлына қатысты тергеу жүргізді.
«Жедел уәкіл Шымкент қаласы жол полициясы сержантынан медициналық куәландырудың оң қорытындысын алуға көмек көрсеткені үшін және қызметтен босатпағаны үшін 400 мың теңге сомасында ақшалай қаражат алды деп айыптады. Сонымен қатар, Ф. Шәріпбайұлы ұсталған кезде, оның автокөлігін тінту барысында 9 мм калибрлі «STREAMER-1014» газ тапаншасы табылды», - делінген хабарламада.
30 қаңтарда Шымкент қаласы әл-Фараби аудандық сотының үкімімен Ф. Шәріпбайұлы алаяқтық және қару-жарақтың заңсыз айналымы үшін кінәлі деп танылып, оған 8 млн теңге айыппұл салынды. Ол «капитан» арнайы атағынан айрылып, мемлекеттік қызметте лауазым атқару құқығынан айырылды.