«Гарант 24 Ломбард»: Орал филиалының басшысы құрықталды

Оралда екі адамның 13,5 млн теңгесін алып, тақырға отырғызып кеткен «Гарант 24 Ломбард» ЖШС филиалының директоры ұсталды, деп хабарлайды Skifnews.kz ақпарат порталы Батыс Қазақстан облысы ПД-нің баспасөз қызметіне сілтеме жасап.

Полиция департаментінің баспасөз қызметінің мәліметінше, аталған ЖШС-ға қатысты екі адам шағым түсірген. Қос арыз бойынша келтірілген шығын құны 13,5 млн теңгені құрайды.

Аталған оқиға бойынша ҚР ҚК 190 бабы 4-бөлігіне (алаяқтық) сәйкес сотқа дейінгі тергеу амалдары жүргізілуде. Жедел іздестіру шаралары барысында «Гарант 24 Ломбард» ЖШС филиалының өңірлік директоры, БҚО-ның 1980 жылғы тұрғыны ұсталды.

Күдікті Орал қаласы полиция басқармасының уақытша ұстау изоляторына қамалды. Осыған дейін «Гарант-24» ломбардының Тараз, Қарағанды және Павлодар филиалдарының басшылары ұсталғанын хабарлаған едік.