Бүгін кешке Нұр-Сұлтан қаласындағы «Нұрсая» тұрғын үй кешенінен өрт шықты, деп хабарлайды Skifnews.kz ақпарат порталы, ІІМ Төтенше жағдайлар комитетіне сілтеме жасап.
«4 наурыз күні сағат 19:59-да Нұр-Сұлтан қаласының «101» пультіне Достық көшесі бойындағы «Нұрсая-2» тұрғын үй кешенінен өрт шыққаны туралы хабарлама түсті. Оқиға орнына елордалық ТЖД жеке құрамының 27 маманы мен 6 өрт сөндіру техникасы аттанды», - деп хабарлады комитет өкілдері.
Ведомство мәліметінше, төтенше жағдай қызметкерлері тұрғын үй кешеніне жеткен кезде 8-қабаттағы пәтерлердің бірінен қою түтін байқалған.
«Керме төбе мен жиһаздар жанған. Қабылданған шаралардың арқасында қызыл жалын сағат 20:46-да сөндірілді. Тілсіз жау шарпыған аумақ шамамен 50 шаршы метрді құрайды. Зардап шеккендер мен қаза тапқандар жоқ» делінген ақпаратта.
Бұл – осы үйдің үшінші рет өртенуі. Бұдан бұрынғы төтенше жағдайлар 2016 жылдың шілдесі мен 2018 жылдың наурызында болған еді.