Жалдамалы көлікті тізгіндеген жүргізуші жол апатына себепші болды

Polo солға бұрылған кезде бар жылдамдықпен жолдың қарсы бетіне шығып кеткен.

Алматыда көлікті жалға алған жүргізуші жол апатына ұшырады, деп хабарлады Sputnik Қазақстанға құқық қорғау органдары.

Жол апаты "Қалқаман-2" шағын ауданында Байзақ батыр және Тыныбаев көшелерінің қиылысында болды. Куәгерлер мен "Лада Приора" жүргізушісінің айтуынша, каршеринг (көлікті жалға беру) қызметіне тиесілі Volkswagen Polo Тыныбаев көшесінде келе жатқан.

Polo солға бұрылған кезде бар жылдамдықпен жолдың қарсы бетіне шығып кеткен. Жүргізуші рөлді бұрып, "Ладаға" соқтығысқан, содан кейін жеке тұрғын үйдің металл қоршауын бұзып, аулаға ұшып түсіп, жолындағы ағашты құлатқан, содан соң басқа үйдің бетон қоршауын соққан.

Апат салдарынан Volkswagen Polo жүргізушісі мен жолаушысы зардап шекті. Олар көптеген жарақатпен ауруханаға жеткізілді.