Ақ үйге жақын маңда атыс болып, Трамптың баспасөз брифингісі үзілді

Дүйсенбі күні АҚШ президенті Дональд Трамптың баспасөз брифингісі кенеттен үзіліп, құпия қызметінің мамандары брифинг өтіп жатқан жерден президентті алып кетті, деп жазды Abai.kz.

 Бірнеше минуттан соң президент залға оралып, Ақ үйге жақын жерде атыс болғанын хабарлады.

Президент Трамптың сөзінше, құпия қызметінің мамандары қарулы адамды атқан. АҚШ президентін қорғайтын құпия қызметінің мамандары Twitter-де оқиғаға байланысты тергеу жүргізіліп жатқанын хабарлады. Құпия қызметінің бір өкілі және қаруы бар делінген адам ауруханада жатыр. Ресми хабарламаға сәйкес, Ақ үй аумағына ешкім кірмеген және онда жұмыс істеп жатқандарға қауіп төнбеген.

Оқиға Ақ үй орналасқан көшеде болған. Ақпарат құралдарының хабарлауынша, брифингте отырғандар президент сөйлей бастағаннан кейін бірнеше минут өткен соң оқ атылғанын естіген және қауіпсіздік қызметінің маманы Трампқа барып Ақ үйге жақын жерде атыс болып жатқанын хабарлаған. Президент бұдан соң брифинг залынан шығып, кабинетіне барған. Сәлден соң қайта оралып, баспасөз мәслихатын жалғастырған. "Бұл оқиғаға алаңдап тұрсыз ба?" деген сұраққа Трамп "алаңдап тұрған адамға ұқсаймын ба?" деп жауап берген.

Құпия дереккөзіне сүйенген Associated Press агенттігінің хабарлауынша, аты-жөні белгісіз ауруханада жатқан күдіктінің жағдайы ауыр. Тергеушілер оның әрекетінің себебін анықтауға тырысып жатыр.