«Алдап-сулап тауға әкелдім»: Әли Оқапов әйеліне қалай ұсыныс жасағанын айтты

Әнші Әли Оқапов "Менің өмірім" бағдарламасында жұбайы Ақерке Бүркітбайға қалай ұсыныс жасағанын баяндап берді, деп хабарлайды Skifnews.kz ақпарат порталы.

Әнші ұсынысты қалай ойластырғанын, сақинасын 2-3 апта қалтасында ұстап "сол сәтті" күткенін айтты.

"Кім біледі, кей кездері аяқ асты әдемі көрініс болып қалады. Сондай кезде дайын болу үшін сақинаны өзіммен бірге алып жүргенмін. Бірақ ондай сәт болмады. 2020 жылдың 7 шілдесінде біздің жақын достарымыз, танымал жүргізуші Тимур Балымбетов үйленді. Біз оларға тойда жолдастары болдық. Бұл карантин кезі, тек далада жүруге болады. Сондықтан естелікке фотосессияны төртеуміз жасап жүргенбіз. Сол кезде ұсынысқа лайықты сәт болды. Бірақ бүгін біздің күн емес, бүгін Тимур мен Лаураның күні, оларға жағаласпай-ақ қояйық деп ойладым. Әрине, қуанышқа қуаныш қосылған жақсы ғой, десе де барлығын оларға арнайық деп өзімді тоқтаттым", -дейді әнші.

Алайда, дәл келесі күні - 8 шілде күні өнер иесі достарын жинаған.

"Ақеркені алдап-сулап тауға әкелдім. Мен емес, менің досым - "Ринго" тобының мүшесі Данияр Ақеркеге "тауға барайық, Әли сол жақта түсірілімге көмектесіп жүр" дейді. Сөйтіп екеуі таксимен тауға келді. Ал мұнда мен достарымызбен тұрмын. Мен гүлмен тұрмын, күн батып бара жатыр, бүкіл қала алақандағыдай көрінеді. Сол кезде мен ұсыныс жасадым. Ақерке сенбей тұрған, содан кейін маған "неге бүгін, менің түрім ең быт-шыт кезінде" деп айтты. Жұмыстарымен футболка мен джинспен жүрген ғой. "Әдемі көйлек киіп келмеймін ба" деп айтты. Мен "ондай кезде тосынсый болмайтын еді" дедім", - дейді Әли Оқапов.