Бүгін актер Азамат Сатыбалдының туған күні

47 жыл бұрын (1977) қазақ драма театры, кино, телевидение, дауыс беру және дубляж актері, продюсер, Қазақстанның еңбек сіңірген қайраткері Азамат Сатыбалды дүниеге келді, деп хабарлайды Skifnews.kz ақпарат порталы.

Жамбыл облысы Мерке ауданы Тұрар Рысқұлов ауылында дүниеге келген. Т. Жүргенов атындағы Қазақ ұлттық өнер академиясын театр және кино актер мамандығы бойынша бітірген.

Еңбек жолын 2000 жылдың маусым айында Қостанай облыстық қазақ драма театрында әртіс болып бастады. 2001-2018 жылдары М. Әуезов атындағы Қазақ мемлекеттік академиялық драма театрында актер болып қызмет атқарды. 2013-2018 жылдары «Қазығұртфильм» ЖШС кадр және шығармашылық жұмыс жөніндегі атқарушы директоры болды. 2018-2022 жылдары Ғ. Мүсірепов атындағы Қазақ мемлекеттік академиялық балалар мен жасөспірімдер театрының директоры лауазымын атқарды.

2022-2023 жылдары Т. Жүргенов атындағы Қазақ ұлттық өнер академиясының ректоры, 2023-2024 жылдары Шәкен Айманов атындағы «Қазақфильм» АҚ президенті қызметін атқарды.

«Құрмет» орденімен марапатталған.