Әртістер тек шенеунікті жақтайды. Мықты болсаңыз неге Шерзаттың отбасын қорғамадыңыз?
«МузАрт» тобының әншісі Мейрамбек Беспаев уақытша ұстау изоляторында отырған экс-шенеунік досы Болат Мажағұловқа қолдау білдірді, деп хабарлайды Sкifnews.kz ақпарат порталы.
Танымал әншін бұл туралы Instagram парақшасында жазды.
«Жаласына жалғанның күйе бердім,
Талқысына басымды ие бердім.
Бақытын да, қуаныш, қайғысын да,
Сүйе бергім келеді, сүйе бергім…
Болат бауырымның басына бұлт үйірілгелі біраз болды. Кімнің жолын кесіп, кімнің алдынан көлденең өттің екен? Жібі түзу дәлелі болмаса да сені әлі сүйреп жүр. Мен білікті басшы, өз ісінің маманы кім десе, сені көрсететін едім. Себебі, сен өнер мен мәдениеттің қарыштап дамуына қомақты үлес қостың. Жалаң аяқ жар кешіп, қызылаяқ қыр кешіп жүріп еңбек еттің. Бұл күндер де өтер.
Бөке, бір кездері қолтығынан демеп, қасынан табылған өнер адамдары сенімен бірге. Біз бұл істің әділ шешім табатынына сенеміз. Қаратаудай қайғы арқаласа да қайыспайтын ердің ұрпағысың. Мықты бол. Жақсы күнде жадырап отыруды жазсын», — деп жазды әнші.
Осы орайда, желі қолданушылары әншіге саясатқа араласпауға кеңес берді.
«Мәке, саясатқа араласпаңыз», «Болаттың ұсталғаны қашан, неге енді жақтап жатырсыз», «Әртістер тек шенеунікті жақтайды, неге Шерзаттың отбасын қорғамадыңыз?» деп жаза жөнелді көпшілік.
Еске салсақ, былтыр қыркүйекте Астана әкімдігі мәдениет басқармасының бұрынғы бастығы Болат Мажағұлов ұсталған. Ол 2016 жылы «Күн» субұрқағын салу кезінде қаражат жымқырды деген күдікке ілінген.