«Қызымды келін қылмаңыздар!»: Жанна Ахметова қызының ажырасуына қатысты шындықты айтты (ВИДЕО)

Жанна Ахметова қызы Наима Байсафаның отбасындағы қысым мен қаржылық зорлыққа байланысты ажырасуға бел буғанын мәлімдеді,деп хабарлайды Skifnews.kz ақпарат порталы. 

Блогер әрі стилист Жанна Ахметова журналист Тимур Балымбетовке берген сұхбатында қызы Наима Байсафа мен күйеуі Руслан Хайруллаевтың ажырасу себебі туралы алғаш рет ашық мәлімдеді. Белгілі болғандай, ерлі-зайыптылардың арасында қаржылық қысым мен отбасылық келіспеушіліктер жиі орын алған.

Наима мен Русланның ортақ бір қызы бар. Алайда, Жаннаның айтуынша, күйеу баласы әр нәрсені ақшаға тіреп, әйеліне психологиялық қысым көрсеткен.

Стилист қызының некедегі ауыр күндері туралы былай дейді:

«Негізі, зорлық-зомбылық дегеніміз тек ұру емес қой. Ол көзге көрінбеуі мүмкін, бірақ күйеуі әйеліне күн сайын қысым жасайды, соның ішінде ақшалай жасайды, күнде қорлайды».

Жанна Ахметова қызын тұрмысқа шыққаннан кейін тек сегіз айдан соң барып көргенін, ал бүкіл бір жыл ішінде бар болғаны бес рет жолыққанын айтты. Бұл – күйеуінің оған анасымен араласуға тыйым салғанының дәлелі.

Сұхбат барысында Жанна Ахметова болашақ құдағиымен алғаш танысқан сәтте ескерту жасағанын да айтты:

«Қызымды келін қылмаңыздар, ол тамақ істей алмайды, тіпті, шұжық турай алмайды деп айтқамын. Бірақ, олар маған «бізге керегі ол емес» деген еді».

Алайда, кейіннен күйеуінің анасы олардың арасына түсіп, қарым-қатынасты қиындатқаны анықталды.

Қызы мен жиеніне көмектесу үшін Жанна Ахметова бірнеше апта қызымен бірге тұрып, отбасындағы жағдайды бақылаған:

«Басында бір күн, екі күн, он күн, кейін қырық күн бақылап жүрдім: менің қызым үнемі жылап, үйде жалғыз өзі жүрді. Ал, жолдасы жоқ», — деді ол.