Ригада Димаш Құдайбергеннің жанкүйерлері бас қосты (ФОТО)

11 желтоқсанда Рига қаласында, Димаштың жеке концерті қарсаңында, Dears қауымдастығының дәстүрлі халықаралық кездесуі өтті, деп хабарлайды Sn.kz ақпарат порталы. 

Музыка мен шабытқа және Қазақстан мен Латвияның ортақ мәдениеттеріне толы бұл кеш әртүрлі елдерден келген көптеген тыңдармандарды біріктірді.

Қабылдаушы елдің дәстүрлерімен танысу ұлттық латыш аспабы – кокленің әуезінен басталды. Бұған дейін, яғни Димашты әуежайда қарсы алу кезінде, латвиялық фан-клуб өкілдері әншіге осындай аспап тарту еткен еді. Осы жолы шебер Дзинтарс Липорстың орындауындағы кокле әуені тыңдарманды Латвияның рухани кеңістігіне бөледі.

Кеш қонақтары белгілі «Dzeguzīte» ансамблінің өнерімен де танысу мүмкіндігіне ие болды. 1953 жылдан бастап шығармашылық жолын жалғастырып келе жатқан бұл ұжым талай жылдар бойы латыш мәдениетін әлемге танытып келеді.

Танымал ұжымның орындауында әйгілі композитор Раймонд Паулстың «Dāvāja Māriņa» және «Circenīša Ziemassvētki» шығармалары ұсынылды. Ал бағдарламаның соңында орындалған көпшілікке белгілі «Атасының жанындағы әжесі» әні тыңдармандарды бақытты балалық шағына жетеледі.

Қазақстан мәдениетінің басты аспаптық символы – домбра бұл кеште Чилиден келген Димаштың жанкүйері Андреаның орындауында үн қосты.

Қазақстанның бай мәдениетін таныстыруды отандық әртістердің әндері мен билері жалғастырды. Олар туған өлкенің музыкасына тән ерекше сұлулық пен рухани жанын ашып көрсетті.

Димаштың көпұлтты жанкүйерлер қауымдастығының айрықша болмысын айқындау мақсатында пре-пати барысында Латвия–Қытай қоғамының өкілдері де өнер көрсетті.

«Riga Symphony» фестивалінің жас жұлдыздары бірнеше тілде шығармалар орындады: Валерия Кучма «Любовь настала» және «Crazy» әндерін, Рафаэла Мария Кастелуччи итальян тіліндегі «E la mia vita» композициясын, ал латвиялық Марта Граве «Something’s Got a Hold on Me» әнін шырқады.

Қырғызстандық әртіс Ильяс Құтманов Димаш репертуарындағы культтік шығарма – «S.O.S. d’un terrien en détresse» туындысын орындады.

Қазақстандық әнші, «Бақытты бала 2022» және «Riga Symphony 2024» байқауларының жеңімпазы Жанерке Абдрахманова кеш қонақтарына «Your Love» және «Қорқыт қобыз» туындыларын орындап берді.

Сосын барлық қатысушылар – жергілікті тұрғындар мен әр елден келген қонақтар – Димаштың авторлық әні «Ұмытылмас күнді» бірге шырқады.

Бұл кештің есте қаларлық болуына құрметті қонақтар – Димаш командасының мүшелері және оның ата-анасы Қанат пен Светлана Айтбаевтар да өз үлестерін қосты. Оларды қазақтың дәстүрлі шашуымен қарсы алды.

Қанат аға бүкіл отбасы атынан ригалықтар мен сырттан келген қонақтарға керемет қарсы алулары мен ұзақ жылғы қолдаулары үшін шынайы алғысын білдірді.