«Еркектермен тең тұруы керек»: Баян Алагөзова әйел мәртебесін көтеру қажеттігін айтты (ВИДЕО)

Қазақстандық продюсер Баян Алагөзова қоғамдағы әйелдердің рөлі мен мәртебесіне қатысты пікір білдірді. Ол «Төрт әйел алу керек» дейтін ер азаматтарға өз ұстанымын ашық айтып, қазіргі заманда ер мен әйел тең дәрежеде болуы тиіс екенін жеткізді, деп хабарлайды Sn.kz ақпарат порталы.

Продюсердің айтуынша, отбасында да, қоғамда да бір тараптың үстем болуы дұрыс емес. «Еркектермен тең тұруы керек» деген ойын алға тартқан ол, әйел заты тек үй шаруасымен шектелмей, өзін дамытуға, білім алуға және кәсіби тұрғыда өсуге құқылы екенін атап өтті.

Баян Алагөзованың пікірінше, бүгінгі таңда әйел адам өз ойын ашық айтып, шешім қабылдауға қабілетті тұлға ретінде танылуы керек. Ол ерлердің бірнеше әйел алуды қалыпты жағдай ретінде көрсетуін заман талабына сай емес көзқарас деп бағалады.

Продюсер қазіргі қоғамда қарым-қатынас өзара сыйластық пен түсіністікке негізделуі қажет екенін де тілге тиек етті. Оның сөзінше, отбасының берік болуы үшін екі жақ та бірдей жауапкершілік алып, тең дәрежеде шешім қабылдауы маңызды.

Желі қолданушылары Баян Алагөзованың бұл пікірімен келісіп, оны қолдайтындарын жазуда. Әсіресе әйелдер қауымы продюсердің батыл мәлімдемесін оң қабылдап, қоғамда әйел мәртебесін көтеру қажет екенін алға тартты.

Айта кетейік, Баян Алагөзова бұған дейін де әлеуметтік мәселелерге қатысты ашық пікір білдіріп, әйелдердің құқығы мен мүмкіндігін қорғау тақырыбын жиі көтеріп жүр.