«Мен ондай көп ақша таппаймын»: той әншілерінен науқас балаларға көмек сұралды

OYBAY SHOW бағдарламасының жүргізушісі Мұхит Сапарбаев онкологиялық аурумен ауыратын балаларға жаңажылдық сыйлық алу үшін жұлдыздарға кәмпит сатты. Бір кәмпит үшін әр әнші қалағанынша ақша төлеуі тиіс болды, деп жазады Stan.kz.

Бұл орайда, Иван Бреусов 10 мың теңге, Ayree продюсері әнші үшін 8700 теңге, Арман мен Аша 30 мың теңге, Назым Аруназ 10 мың теңге, Ziruza 10 мың, Айқын Төлепберген 20 мың теңге берді. Одан бөлек, басқа да жас әншілер ақшасын аударып жатты.

Өзімен бірге ақша жоқ екенін айтқан әншілер де бар. Мәселен, Серік Гамза-заде бір кәмпит үшін 30 мың теңге бере алмайтынын ашық айтты. «Мен ондай көп ақша таппаймын», - деген Серік ешқандай ақша бере алмады.

Азия тобының әншісі Ренат Баситов топ атынан деп 2500 теңгесін қиды. «Енді науқас балаларға берілетіндіктен, көбірек қаражат берейін, бұл ақша өз қалтаңа емес, нақты балаларға жетеді деп сенем», - деп баса айтты Ренат Баситов.

Мұхит Сапарбаев осыдан соң Алматы қаласында орналасқан республикалық деңгейдегі онкологиямен ауыратын балаларды емдейтін диагностикалық орталыққа келді. Бұл жердегі балалар Қазақстанның түкпір-түкпірінен жиналған. Әншілерден жиналған қаражат 132 мың теңге болды. Бұл қаражатқа 14 сыйлық алынды. Қалған қаражат OYBAY SHOW бағдарламасы атынан тарту болды.

Мұны көрген желі қолданушылары балаларға ақша аударған әншілерге алғысын айтты. Енді бірі әншілерді сараң деп сөкті.

«Тойдан миллиондап ақша аласыздар. 5-10 мың теңге беруге ұялмайсыздар ма?», «Азия тобы 2500 теңге берді. Мынау деген сұмдық қой! Сонша сараң болуға бола ма?», «Мұхитқа рахмет, балалардың көңілін көтердің. Бермейтін әншілердің қолынан барып алдың» деп жазды олар.