Алматы облысындағы жол апатынан алты адам зардап шекті

Алматы облысында BMW және Daewoo соқтығысып, алты адам зардап шекті. Арасында кәмелетке толмаған бірнеше адам бар, деп хабарлайды Sputnik Қазақстан.

Жол апатының бейнежазбасы әлеуметтік желілерде тарап кетті. Жол апаты Байсерке - Тілендиев тас жолының жиырма алтыншы шақырымында болған.
"Жігіттер, көлікті асықпай жүргізіңіздер. Қазір бұл көлікте балаларымыз жатыр, біз қазір ауруханаға бара жатырмыз", - дейді видео авторы.

Балалар ауыр жараланған, бірі жансақтау бөлімінде жатыр.

Алматы облысының полиция департаменті апат 30 сәуірде Іле ауданындағы Төңкеріс - Байсерке - Қараой - Межуреченск автожолында болғанын хабарлады. 20 жастағы Daewoo жүргізушісі жаяу жүргіншілер жолағына тоқтағанда BMW көлігі келіп соғылған. Салдарынан көліктің бірі аялдамаға соғылған.

"Жол апатынан алты адам зардап шекті, оның ішінде бірнеше кәмелетке толмағандар бар. Олардың бірі, жаяу жүргіншілер өткелінен өтіп бара жатқан 17 жастағы жасөспірім, әртүрлі жарақаттармен ауруханаға жатқызылды. Қалғандары медициналық тексеруден кейін үйге жіберілді. Тергеу қылмыстық кодекстің 345-бабы "Жол қозғалысы немесе көлік құралдарын пайдалану ережелерін бұзу" бойынша жүргізіледі",- деп хабарлады Алматы облысы полиция департаментінің баспасөз қызметі.

Ведомство жол апаты бойынша мән-жайларды зерттеудің толықтығы мен объективтілігі үшін барлық қажетті сараптамалар жасалып жатыр.