Ресейдің Приморьесінде су тасқыны болып жатыр

Приморьеге Ресей Төтенше жағдайлар министрлігі орталық аппаратының жедел тобы жіберілді, мамандар су тасқынымен күресу жұмыстарын үйлестіреді, деп хабарлайды ҚазАқпарат ТАСС агенттігіне сілтеме жасап.

Жаңбыр салдарынан Приморьеде 7 көпқабатты және 729 жеке үйді су басып, барлығы 65 елді мекен зардап шекті.

Приморьедегі екінші үлкен қала Уссурийсктегі су тасқыны соңғы 10 жылдағы ең жойқын және ауқымды болды, қаланың 35-40% зардап шекті. Раздольная өзеніндегі су рекордтық 10 метрге дейін көтерілді, бұл «7 жел» шағын ауданын қорғайтын, салынып жатқан бөгет деңгейінен жоғары, соның салдарынан тұрғын үйлер су астында қалды. Сондай-ақ, сол жерде Мәңгілік алау мемориалына газ беру тоқтатылды, қалалық мұражай эвакуацияланды.

9-11 тамыз аралығында Приморьенің оңтүстігінде қатты жаңбыр жауды, 188 мм-ге дейін жауын-шашын түсті. Чугуевский, Хасанский, Яковлевский, Октябрьский, Черниговский, Лазовский, Ольгинск округтері, Уссурийский және Находка қалалық округтері, сондай-ақ Михайловский ауданы қатты зардап шекті. Бұл өзендердегі су деңгейінің көтерілуіне және көптеген аумақтарды су басуына себеп болды. Облыс бойынша уақытша орналастыру орталықтарында 612 адам бар.