Мемлекеттік туды балкондар мен үй-жайларға ілуге ​​рұқсат етілмек

Туризм және спорт министрлігі Мемлекеттік Туды, Мемлекеттік Елтаңбаны және олардың бейнесін пайдалану (орнату, орналастыру) қағидаларына өзгерістер мен толықтырулар енгізетін Үкімет қаулысының жобасын әзірледі, деп хабарлайды Skifnews.kz ақпарат порталы.

Атап айтқанда, мемлекеттік туды қолдану аясы кеңеймек.

Мемлекеттік Туды мемлекеттік заңды тұлғалардың, ұлттық басқарушы холдингтердің, ұлттық холдингтердің, ұлттық компаниялардың, сондай-ақ Қазақстан Республикасы оларға қатысты жалғыз акционер (қатысушы) өзге де акционерлік қоғамдардың және жауапкершілігі шектеулі серіктестіктердің, ұйымдардың ғимараттарында және мекемелерi басшыларының кабинеттерiнде ұдайы, мектепке дейінгі, жалпы орта, кәсіптік бастауыш, кәсіптік орта, кәсіптік жоғары және жоғары оқу орнынан кейінгі кәсіптік білім беру бағдарламаларын іске асыратын білім беру ұйымдарының ғимараттарында ұдайы және жаңа оқу жылының ашылу және оқу жылының аяқталу рәсімдері кезінде ілуге рұқсат етілді.

Жеке тұлғаларға тиесілі ғимараттарда, үй-жайларда (үй-жайлардың бөлігінде, балкондарда) Мемлекеттік Ту көлбеу түрде (45 градустан көп болмауға тиіс) орналастыруға рұқсат етіледі.

Бірақ Қазақстан Республикасының Мемлекеттік Туын қоғамдық бірлестіктер мен басқа да ұйымдар жалаулары, мөрлері және таңбаларының геральдикалық негізі ретінде пайдалануға болмайды.

Құжат бойынша, жеке тұлғаларға тиесілі ғимараттарда, үй-жайларда (3 метрден төмен емес биіктікте) Қазақстан Республикасының Мемлекеттік Ту (1 х 2 метр өлшеммен) орналастырылады.

Мемлекеттік Туды қорлау фактілеріне мыналар жатады:

• физикалық түрде залал келтіру (жырту, жағу, өртеу, қасақана жерге тастау, таптау, қоқысқа лақтыру);
• коллаждар жасау арқылы мемлекеттік туды қорлау, тыйым салынған және мақсатқа сай емес жерлерде пайдалану, әлеуметтік желілерді қоса алғанда Мемлекеттік Туды көпшілік алдында мазақ ету, балағаттау.

Құжат 27 қыркүйекке дейін қоғамдық талқылау үшін Ашық НҚА сайтында жарияланды.

Дереккөз: Zakon.kz