8 қаңтардан бастап мектеп оқушылары қашықтан оқыту форматына ауыстырылды.
Шығыс Қазақстан облысы Күршім ауданында қалың қар түсіп, ауыл халқы аттап баса алмай қалды. Қар құрсауында қалған халыққа көмек көрсету үшін тікұшақ жұмылдырылды, деп хабарлайды Skifnews.kz ақпарат порталы.
Кешелі бері әлеуметтік желіде Күршім ауданындағы ауылдардың қар астында қалғаны туралы видеолар тарап жатыр. Соның салдарынан халықтың қаламен, аудан орталығымен қатынасы үзілген. ШҚО әкімдігінің мәліметінше, ауыл тұрғындары үшін азық-түлік пен дәрі-дәрмек тікұшақпен жеткізілді.
Күршім ауданында 7 қаңтардан бастап қарлы боран тоқтамай тұр. Кейбір жерлерде қар қалыңдығы 1.8-2 метрге жетті. Маралды және Төсқайың ауылдық округтерінің елді мекендеріне көлік қатынасынан қалды. Қардың түсуі нормадан асып кетуін және елді мекендерге көлік қатынасының болмауын ескере отырып, Күршім ауданының әкімдігі жергілікті ауқымдағы табиғи сипаттағы төтенше жағдай жариялады, – делінген ақпаратта.
ШҚО Көлік және автомобиль жолдары басқармасының деректері бойынша жол жүруді қамтамасыз ету үшін қосымша техника жөнелтілді. Қазіргі уақытта 24 арнайы техника жұмылдырылған. Алайда боранға байланысты жұмыс істеу қиындық тудыруда.
Сондай-ақ Күршім ауданына қажетті көмек көрсету үшін ШҚО ТЖ департаментінің өтімділігі жоғары техникасы келді. Маралды және Төсқайың ауылдық округтері мектептерінің оқушылары 8 қаңтардан бастап қашықтан оқыту форматына ауыстырылды. 16 қаңтарда ауылдық округтердің тұрғындарына қажетті азық-түлік пен дәрілік заттарды жеткізу үшін тікұшақ жіберілді. Жағдай жергілікті атқарушы органдардың бақылауында, – делінген хабарламада.